Prezıdent turǵyndar qaýipsizdigi úshin beınebaqylaý júıesin damytý da mańyzdy jumys ekenin atap ótti.
Búgingi tańda Almatyda 128 myńnan astam jeke beınebaqylaý kamerasy ornatylǵan, onyń tórtten bir bóligi ǵana qalalyq polısııa departamentiniń jedel basqarý ortalyǵymen biriktirilgen.
Osyǵan oraı, Q.Toqaev ákimdik menshik ıesiniń kelisimimen jeke beınebaqylaý júıelerin biryńǵaı dıspetcherlik pýnktke ıntegrasııalaý jónindegi erejeni qabyldaýy kerektigin aıtty.
«Sondaı-aq beınebaqylaýmen qamtylmaǵan obektilerde 20 myńǵa jýyq kamera ornatý qajet. Jıi baratyn qoǵamdyq oryndar, sondaı-aq eń kóp quqyq buzýshylyqtar oryn alatyn qalanyń aýdandary dabyl túımelerimen jabdyqtalýy kerek. Qalanyń bilim berý jáne densaýlyq saqtaý mekemeleriniń keshendi qaýipsizdigin qamtamasyz etý óte mańyzdy», dedi Prezıdent.
Qasym-Jomart Kemeluly ol jerlerge qaýipsizdik kameralaryn, dabyl túımelerin, týrnıketterdi, kúzet jáne órt dabyldaryn ornatý kerektigin eskertti.
«Men bul týraly egjeı-tegjeıli aıtyp otyrmyn, óıtkeni bul azamattardyń qaýipsizdigi úshin óte mańyzdy. Bul tehnologııany vokzaldarda, áýejaıda jáne basqa da adamdar kóp jınalatyn jerlerde qoldaný óte mańyzdy. Bul júıe 2026 jylǵa qaraı qalada tolyq jumys isteýi kerek», deıdi Memleket basshysy.
